Երեխաների և սոցիալական պաշտպանության վարչության կողմից 2025թ. առաջին կիսամյակում կատարված  աշխատանքների և միջոցառումների վերաբերյալ

Հաշվետվություն

Երևանի քաղաքապետարանի աշխատակազմի երեխաների և սոցիալական պաշտպանության վարչությունը, իր կանոնադրության համաձայն, Երևան համայնքի բնակիչների կարիքներին պատշաճ արձագանքելու նպատակով, իր լիազորությունների շրջանակներում իրականացնում է մի շարք գործառույթներ.
Համագործակցություն է իրականացվել ՀՀ աշխատանքի և սոցիալական հարցերի, տարածքային կառավարման և ենթակառուցվածքների, արդարադատության, ներքին գործերի նախարարությունների, վարչական շրջանների ղեկավարների աշխատակազմերի, միասնական սոցիալական ծառայության տարածքային կենտրոնների, մանկատների, երեխաների խնամքի և աջակցության կենտրոնների, ինչպես նաև ոլորտում ակտիվ գործունեություն ծավալող կազմակերպությունների հետ: 
Վարչության կողմից աշխատանքներ են տարվել երեխաների և սոցիալական պաշտպանության ոլորտին առնչվող համապարփակ մեխանիզմների մշակման և ներդրման նպատակով:
Վարչության գործառույթներին առնչվող խնդիրների վերաբերյալ խորհրդատվություն է տրամադրվել քաղաքացիներին:
Վարչության կողմից իրականացվել են այցեր վարչական շրջանների ղեկավարների աշխատակազմերի երեխաների և սոցիալական պաշտպանության բաժիններ՝ բարդ դեպքերի, իրականացվող աշխատանքների, ծրագրերի վերահսկողության, սուպերվիզիայի իրականացման նպատակով: Իրականացվել է մեթոդական համակարգում: 
Վարչության կողմից վերահսկողական այցեր են կատարվել ՀԿ-ներ, որոնց վարչության կողմից տրամադրվել են դրամական աջակցություն՝ խոցելի խմբերին ծառայություններ մատուցելու նպատակով:
Կազմակերպվել են շահառուների ընդունելություններ, գնահատվել են  կարիքներ, տրամադրվել համապատասխան խորհրդատվություն և հանձնարարականներ՝ վարչական շրջանների ղեկավարների աշխատակազմերի համապատասխան բաժիններին: 
Վարչության աշխատակիցները մասնակցել են տարբեր քննարկումների, հանդիպումների և դասընթացների (Անչափահասների արդարադատության խորհրդի նիստ, Սոցիալական նախարարական կոմիտեի նիստ, Երեխաների պաշտպանության միջազգային օրվան նվիրված՝ ՀՀ մարդու  իրավունքների պաշտպանի նախաձեռնությամբ, Յունիսեֆ-ի աջակցությամբ մարդու իրավունքներին պաշտպանին առընթեր երեխաների իրավունքների պաշտպանության հասարակական խորհրդի նիստ, Կանանց հարցերով խորհրդին կից աշխատանքային խմբի նիստ, «Ապագա» բարեգործական հիմնադրամի 2024 թվականի ամփոփիչ միջոցառում, «Միավորվելով հանուն սոցիալական արդարության» միջազգային համաժողով, «Բարնահուս» մոդելի կիրառման նպատակով մասնագետների կարողությունների զարգացմանը միտած վերապատրաստում-քննարկում, և այլ):

Սոցիալական պաշտպանության ոլորտ

«Հանս Քրիստիան Կոֆոեդ» բարեգործական հիմնադրամին յուրաքանչյուր ամիս ներկայացրած հաշիվների հիման վրա տրամադրվել է  աջակցություն կոմունալ ծառայությունների՝ էլեկտրաէներգիայի, գազի և ջրի  ծախսը փոխհատուցելու  նպատակով: Կազմակերպությունը ծառայություններ է տրամադրում շուրջ 100 անօթևան անձի: 
«Փրկություն» ՀԿ-ին տրամադրվել է դրամական աջակցություն կոմունալ ծառայությունների փոխհատուցման  նպատակով: Կազմակերպությունը ծառայություններ է մատուցում Երևան համայնքի տարբեր վարչական շրջաններում բնակվող մտավոր խնդիրներ ունեցող շուրջ 60 հաշմանդամություն ունեցող երեխաներին:
«Քայլ առաջ» սոցիալական հասարակական կազմակերպությանը տրամադրվել է աջակցություն Երևան համայնքում հաշմանդամություն ունեցող շուրջ 120 երեխաներին /այդ թվում՝ սոցիալական աջակցության կարիք ունեցող/ անվճար թերապիաներ տրամադրելու նպատակով: 
«ՍՈՐՍ» հաշմանդամություն ունեցող  երեխաների և նրանց ընտանիքներին աջակցության հիմնադրամին Երևան համայնքի կողմից տրամադրվել է աջակցություն՝ հազվագյուտ հիվանդություններ ունեցող, հաշմանդամություն ունեցող 160 երեխաների կյանքի որակի բարելավմանը, առողջական և մտավոր զարգացմանը նպաստող ծրագրեր իրականացնելու նպատակով:
 «Մանկական զարգացման հիմնադրամ» ՀՄԴ-ին տրամադրվել է  աջակցություն, որի շնորհիվ կազմակերպությունը աջակցել է կյանքի դժվարին իրավիճակում հայտնված ընտանիքների 50 երեխայի՝ տրամադրելով սոցիալ-հոգեբանական, լոգոպեդական, հատուկ մանկավարժական, երաժշտաթերապիայի, թերապևտիկ ծառայություններ:
«Հոգեկան առողջության իրազեկման նախաձեռնություն» ՀԿ-ին տրամադրվել է աջակցություն՝ «Հուզական աջակցության թեժ գիծ» փորձնական ծրագիրն իրագործելու նպատակով: Ծրագրով կազմակերպվել են վերապատրաստումներ, գործարկվել է «Թեժ գիծը», իրականացվել են իրազեկման արշավներ և այլն: Ծրագրի նպատակն է Երևան համայնքի բնակչներին տրամադրել հոգեբանական ծառայություն: 
«Լիարժեք Կյանք» ՀԿ-ին տրամադրվել է աջակցություն՝ հաշմանդամություն ունեցող, ինչպես նաև սոցիալական աջակցության կարիք ունեցող ընտանիքների երեխաների /150 շահառու/ ամառային հանգիստը Ստեփանավանում գործող «Լիարժեք Կյանք» ՀԿ-ի ներառական ճամբարում կազմակերպելու համար:
«Հայաստանի խուլերի միավորում» հասարակական կազմակերպությանը տրամադրվել է աջակցություն՝ «Խուլ անձանց հզորացում հանուն ներառման» ծրագրով ստեղծված հեռավոր տեսակապով զանգերի կենտրոնի ծրագրի  շարունակությունն ապահովելու նպատակով:
«Հայաստանի կույրերի  միավորում» հասարակական կազմակերպությանը աջակցություն է տրամադրվել տեսողության խնդիրներ ունեցող անձանց /42 մասնակից/ մասնակցությամբ համերգի կազմակերպման նպատակով: 
«Առաքելություն Հայաստան» ԲՀԿ-ին տրամադրած աջակցության շնորհիվ 2490 շահառուներ հնարավորություն կունենան ստանալ մի շարք սոցիալական, հոգեբանական, իրավաբանական և այլն ծառայություններ: 
«ՀՀ Մարշալ Բաղրամյանի անվան վետերանների միավորում» ՀԿ-ին տրամադրվել է աջակցություն` Հաղթանակի 80-ամյակի կապակցությամբ 21 վետերանների համար: 
Միջոցներ են ձեռնարկվել Երևան քաղաքի սոցիալական աջակցության վերաբերյալ կամավոր խնդիրների լուծմանը միտված ծրագրերի իրականացման շրջանակներում 24.06.2020թ. 253-Ն Երևանի քաղաքապետին կից հասարակական կարգով գործող սոցիալական աջակցության տրամադրման խորհրդի կազմավորման առնչությամբ: Խորհրդի նիստի ընթացքում քննարկվել և հաստատվել է 7 դեպք, որից 5-ն ուսման վարձի փոխհատուցում,   երկու դեպք՝ ուղղված կենցաղային պայմանների բարելավմանը, սակայն փաստաթղթերը ոչ ժամանակին և ոչ ամբողջական ներկայացնելու պատճառով մեկ դեպքը մերժվել է:
Հիմք ընդունելով Երևան քաղաքի ավագանու 19.11.2024թ. N245-Ն որոշումը՝ նախատեսվեց Երևան համայնքում վերջին 5 տարվա հաշվառում ունեցող, 100 տարին լրացած քաղաքացիներին տրամադրել 1.000.000 ՀՀ դրամ: Ծրագիրն իրագործելու նպատակով համադրվել են ցուցակները, որի ընթացքում համագործակցություն է ծավալվել ՀՀ ԱՍՀՆ, ՀՀ ՆԳՆ-ի հետ: Վարչական շրջանների կողմից կատարված ուսումնասիրություններով կազմվել են համապատասխան կարգադրություններ, իսկ ֆինանսավորումն ապահովելու նպատակով վարչությունը համագործակցել է «Հայփոստ» ՓԲԸ-ի հետ: Ծրագրով 39 քաղաքացի արդեն ստացել է  ֆինանսական աջակցություն:
Տարեցների համար նախատեսված սոցիալական  աջակցության ծառայությունների  ծրագրով կազմվել է տեխնիկական բնութագիր և ներկայացվել գնման հայտ, որի շնորհիվ ունենք շահող կազմակերպություն և այժմ նախատեսվում է կազմակերպել ներգնա 55 շրջագայություն շուրջ 1100 տարեցի համար:
Չինաստանի Ժողովրդավարական Հանրապետության դեսպանատան՝ Արցախից տեղահանված ընտանիքներին ուղղված աջակցության ծրագիրն իրականացնելու նպատակով կազմվել է տեխնիկական բնութագիր, կայացել է գնման գործընթաց. նախատեսվում է 475 երեխայի տրամադրել մարզազգեստ:
Հաշմանդամություն ունեցող անձանց համար նախատեսված ծրագրերով սոցիալական տաքսի ծառայության կազմակերպման նպատակով կատարվել են համապատասխան աշխատանքներ: 

Երեխաների պաշտպանության ոլորտ

Կազմակերպվել է երեխաների պաշտպանության միջազգային օրվան նվիրված «Երևանի քաղաքապետարանը՝ երեխաների համար» խորագրով հունիսմեկյան միջոցառում. դպրոցահասակ 64 երեխաների մասնակցությամբ Երևան քաղաքի ավագանու նիստ: Միջոցառման ավարտից հետո կազմակերպվել է երեխաների շրջայց Երևան քաղաքի պատմության թանգարանում, նրանց տրամադրվել են նվեր-գրքեր:
Երեխաների պաշտպանության միջազգային օրվան նվիրված միջոցառումների ընթացքում կազմակերպվել է շուրջ 150 երեխաների այցելություն «Կանաչապատում և շրջակա միջավայրի պահպանության» և «Կենդանիների խնամքի կենտրոն» ՀՈԱԿ-ներ՝ կազմակերպությունների գործունեությանը, առանձնահատկություններին ծանոթացնելու, շրջակա միջավայրի պահպանման մասին գիտելիքներ տալու, ինչպես նաև հոգատարություն սերմանելու նպատակով: 
Կյանքի դժվարին իրավիճակներում հայտնված 30 երեխաներ այցելել են մշակութային օջախներ՝ Կոմիտասի անվան թանգարան-ինստիտուտ, Արամ Խաչատրյանի տուն-թանգարան, որի նպատակն է եղել երեխաների շրջանում հայկական մշակույթի հանդեպ հետաքրքրության մեծացումը ու ազգային արժեքներին ծանոթացումը: Երեխաները ծանոթացել են հայազգի մեծանուն արվեստագետների կյանքին ու ստեղծագործական աշխարհին: Միջոցառման ավարտին երեխաներն ստացել են Կոմիտասին, Արամ Խաչատրյանին նվիրված գրքեր: Ծրագրով այցելություն է նախատեսված նաև հուլիս ամսին շուրջ 20 երեխաների համար Մարտիրոս Սարյանի տուն-թանգարան: 
Հիմք ընդունելով ՀՀ կառավարության 22.06.2006թ. N 962-Ն որոշմամբ հաստատված կարգը՝ վարչական շրջանների կողմից ներկայացված տեղեկատվության համաձայն հաշվառվել է առանց ծնողական խնամքի մնացած 28 երեխա, առանց ծնողական խնամքի մնացած երեխաների թվին պատկանող 1 անձ: 
Հիմք ընդունելով ՀՀ կառավարության 25.09.2015թ. N 1112-Ն որոշմամբ հաստատված կարգը /հավելված 1/՝  17 երեխայի տրամադրվել է երեխաների խնամքի հաստատությունում տեղավորվելու մասին եզրակացություն:
Հիմք ընդունելով ՀՀ կառավարության 18.03.2010թ. N 269-Ն որոշմամբ հաստատված կարգը /հավելված 1/ քաղաքացիների կողմից ներկայացված փաստաթղթերը և կենսապայմանների ուսումնասիրության ակտերը, ինչպես նաև միասնական սոցիալական ծառայության տարածքային կենտրոնների կողմից ներկայացված եզրակացությունները՝ տրամադրվել է երեխա որդեգրելու հնարավորության մասին 4 դրական եզրակացություն, հաշվառման է վերցվել երեխա որդեգրել ցանկացող 5 անձ: Նշված կարգի համաձայն կազմվել և ՀՀ աշխատանքի և սոցիալական հարցերի նախարարություն է ուղարկվել 18 հարցում՝ երեխային տեսակցելու և որդեգրելու հնարավորությունը պարզելու համար, տրամադրվել է որպես որդեգրել ցանկացող հաշվառված անձի և որդեգրման ենթակա երեխայի անձնական շփումների փաստի վերաբերյալ 4 եզրակացություն, հաշվառվել է որդեգրման ենթակա 13 երեխա:
Հիմք ընդունելով ՀՀ կառավարության 13.06.2019թ. N 751-Ն որոշումը՝ 4 քաղաքացի հաշվառվել է որպես խնամատար ծնող դառնալ ցանկացող անձ: Որպես խնամատար ծնող դառնալ ցանկացող հաշվառված անձանց դիմումների հիման վրա, ինչպես նաև հիմք ընդունելով Երևանի քաղաքապետի 25.09.2019թ. N 891-Ա կարգադրությունը, համադրվել է խնամատար անձանց և խնամատարության ենթակա երեխաների 20 տվյալ: Խնամատարության պայմանագրերի ժամկետները երկարաձգելու համար կազմվել են «Խնամատարության պայմանագրերի փոփոխությունների և լրացումներ կատարելու մասին» 17 համաձայնագրերի նախագծեր: Որպես խնամատար ծնող դառնալ ցանկացող անձանց և խնամատարության ենթակա երեխաների տվյալների համադրմամբ կազմակերպված հանդիպումներին մասնակցելու նպատակով այցեր են կատարվել  մանկատներ, խնամքի կենտրոններ: 
Հիմք ընդունելով ՀՀ ընտանեկան օրենսգրքի 128.1 և 139.1 հոդվածը, ինչպես նաև ՀՀ կառավարության 13.06.2019թ. N 751-Ն որոշումը՝ իրականացվել է խնամատար ընտանիքում խնամվող երեխայի՝ հոգեզավակի կյանքի, առողջության, դաստիարակության և կենսապայմանների նկատմամբ վերահսկողություն, ինչպես նաև որդեգրողի ընտանիքում որդեգրված երեխայի խնամքի նկատմամբ  վերահսկողություն:
Կյանքի դժվարին իրավիճակներում հայտնված երեխաների տվյալները մուտքագրվել են «Մանուկ» տեղեկատվական համակարգ, ըստ անհրաժեշտության կատարվել են համապատասխան փոփոխություններ:
ՄԱԿ-ի կայուն զարգացման նպատակների ազգայնացման գործընթացն ապահովելու նպատակով իրականացվող ծրագրով 1-17 տարեկան երեխաների նկատմամբ ծնողների, խնամատարների, օրինական ներկայացուցիչների կողմից ֆիզիկական պատժի և/կամ հոգեբանական ագրեսիայի վերաբերյալ վարչական շրջաններից հավաքած տեղեկատվությունն ամենամսյա կտրվածքով ներկայացվել է ՀՀ աշխատանքի և սոցիալական հարցերի նախարարություն: 
Կյանքի դժվարին իրավիճակներում հայտնված երեխաների իրավունքները և շահերը պաշտպանելու նպատակով բաժինն ապահովել է գործող օրենսդրությամբ իրեն վերապահված լիազորությունների իրականացումը: Վարչական շրջանների խնամակալության և հոգաբարձության հանձնաժողովների հետ քննարկվել են բացահայտված ԿԴԻՀ երեխաների դեպքերը և իրականացվել է ուղղորդում համապատասխան պետական և հասարակական կառույցներ՝ անհրաժեշտ ծառայություններ ստանալու նպատակով: Բաժնի աշխատակիցները մասնակցել են վարչական շրջանների խնամակալության և հոգաբարձության հանձնաժողովների այն նիստերին, որտեղ քննարկվել են երեխային առնչվող հատուկ դեպքեր: Պարբերաբար տրամադրվել են մասնագիտական խորհրդատվություն և մեթոդական աջակցություն խնամակալության և հոգաբարձության հանձնաժողովներին և վարչական շրջանների երեխաների և սոցիալական պաշտպանության բաժնի աշխատակիցներին:
Երեխաների պաշտպանության ոլորտում համագործակցություն է ծավալվել ՀՀ աշխատանքի և սոցիալական հարցերի, արդարադատության, ներքին գործերի նախարարությունների, վարչական շրջանների ղեկավարների աշխատակազմերի, միասնական սոցիալական ծառայության տարածքային կենտրոնների, մանկատների, երեխաների խնամքի և աջակցության կենտրոնների, ինչպես նաև ոլորտում ակտիվ գործունեություն ծավալող կազմակերպությունների հետ:
Երեխաների պաշտպանության վերաբերյալ տարբեր խնդիրներով Երևանի քաղաքապետարան դիմած քաղաքացիներին տրամադրվել է խորհրդատվություն: Վարչությունը մասնակցել է երեխաների պաշտպանության ոլորտին առնչվող հանդիպումներին, քննարկումներին, խորհրդատվություններին: Ոլորտային օրենսդրական նախագծերն ուսումնասիրվել են վարչության կողմից և ներկայացվել են համապատասխան առաջարկներ:

Որդեգրել ցանկացող անձանց նախապատրաստական դասընթացների կազմակերպման և անցկացման ժամանակացույցը, դասընթացի ծրագրի բովանդակությունը հաստատելու մասին