«Նոր Արաբկիր» (կամ Մալականի) զբոսայգին գտնվում է Արաբկիր վարչական շրջանում։ Երևանցիներից շատերն այգին անվանում են նաև «Մալականի» այգի։

Այն զբաղեցնում է Փափազյան փողոցին հարակից տարածքը և ձգվում է մինչև Հրազդանի կիրճը։

2011թ. հուլիսի 21-ին Էրեբունի վարչական շրջանում մեծ հանդիսավորությամբ պաշտոնապես բացվեց Երևան-Լիոն բարեկամության խորհրդանիշ Լիոնի այգին: 

Այգու վերակառուցման ծրագրի համաձայն` տարածքում անցկացվել է արտաքին լուսավորության և ոռոգման նոր ցանց, ստեղծվել են սիզամարգեր, տնկվել են ծառեր, հին սալահատակները փոխարինվել են նորերով, կառուցվել են հասարակական զուգարաններ: 
Բնակիչների հանգստի համար տեղադրվել են նստարաններ և ժամանակակից ոճով զրուցարաններ, իսկ փոքրիկների համար` բազմատեսակ մանկական ժամանցային խաղեր:

Շողակաթի զբոսայգին Գտնվում է Շենգավիթ վարչական շրջանում: Այն հիմնանորոգվել է 2012 թվականին: Ամբողջությամբ փոխվել են եզրաքարերը, սալիկապատվել ճեմուղիները, ստորգետնյա եղանակով անցկացվել է արտաքին լուսավորության նոր ցանց:  Զբոսայգու ողջ տարածքն ապահովվել է ոռոգման նոր ցանցով:
Այն նաև ձևավորվել է ծաղկային կոմպոզիցիաներով ու գեղեցիկ արձանիկներով: Բացի այդ, տեղադրվել են նստարաններ և կառուցվել բաց և փակ զրուցարաններ: Զբոսայգու համալիր բարեկարգման շրջանակում հիմնանորոգվել և գործարկվել է նաև շատրվանը:

Դավթաշեն զբոսայգին գտնվում է Դավթաշեն վարչական շրջանում։ Այն հարում է Տիգրան Պետրոսյան և Փիրումյանների փողոցներին։

Յուրի Բախշյանի անվան զբոսայգին վերաբացվել է 2014թ. հուլիսին: Հանգստի գոտու վերակառուցման աշխատանքներն իրականացվել են Երևանի զարգացման 2014 թվականի շինբարեկարգման ծրագրերի շրջանակում:

Զբոսայգու տարածքում կառուցվել է մանկական խաղահրապարակ, նկարազարդվել են զբոսայգին սահմանազատող շուրջ 350 քմ հենապատերը, ասֆալտապատվել են ճեմուղիների ոչ սալիկապատ հատվածները, թարմացվել են կանաչ տարածքները, նորոգվել է ոռոգման համակարգը: Բացի այդ, տարածքն ապահովվել է արտաքին լուսավորության ցանցով, տեղադրվել են նստարաններ և աղբամաններ:

Գտնվում է Մալաթիա-Սեբաստիա վարչական շրջանում: 1999թ. անվանակոչվել է համայնքի առաջին թաղապետ Վահան Զատիկյանի անունով: Ընդգրկում է Սվաճյան և Րաֆֆու փողոցների միջնամասը: Այստեղ տեղադրված են Զորավար Անդրանիկի արձանը, «Նոյյան տապանը Արարատ լեռան վրա» քանդակը և այլ արձաններ:

Մայրության զբոսայգին գտնվում է Մալաթիա-Սեբաստիա վարչական շրջանում` Զ. Անդրանիկի փողոցին հարակից տարածքում` հ.19 պոլիկլինիկայի դիմաց։ Զբոսայգին անվանակոչվել է 2004 թվականին։

Այստեղ տեղադրված է «Մայրություն» արձանը (քանդակագործ` Ս. Մեհրաբյան, 2004թ.)։

2014թ. նոյեմբերի 11-ին Երևանի քաղաքապետարանի և ՄԱԿ-ի զարգացման ծրագրերի հայաստանյան գրասենյակի հետ համատեղ իրականացվող «Գեղեցիկ Երևան» ծրագրով հիմնանորոգումից հետո շահագործման հանձնվեց «Մալաթիա» պուրակը: 1.7 հա մակերեսով նախկինում կիսաբարեկարգ ու անխնամ տարածքի փոխարեն բնակիչների լիարժեք հանգստի կազմակերպման համար առկա են անհրաժեշտ բոլոր պայմանները: Հանգստի գոտում տեղադրվել են զրուցարաններ, նստարաններ, աղբամաններ ու մանկական խաղեր:

2014 թ. օգոստոսին վերակառուցումից հետո Սեբաստիա-Ա.Սարգսյան փողոցների հատման վայրում բացվեց Ազատամարտիկների այգին:

Նոր Նորք վարչական շրջանի շուրջ 5.8 հա տարածք զբաղեցնող Տիգրան Մեծի այգին ամբողջությամբ վերակառուցվել և վերաբացվել է 2013 թ. նոյեմբերին: 

Բնակիչների լիարժեք հանգստի համար տեղադրվել են նստարաններ, փակ և բաց զրուցարաններ, մանկական ժամանակակից խաղերով կահավորված խաղահրապարակներ, մարզահրապարակներ, ինչպես նաև կառուցվել են ճեմուղիներ: Հանգստյան գոտին ամբողջությամբ ապահովված է նաև արտաքին լուսավորության նոր ցանցով ու շուրջ 1 կմ ոռոգման նոր համակարգով:

1935թ. Հայաստանի գիտությունների ակադեմիայի նախաձեռնությամբ Երևանի հյուսիսում՝ 105 հա տարածքի վրա, հիմնվել է Երևանի բուսաբանական այգին։ 1954թ. այգում ստեղծվել է «Հայաստանի բուսական և կենդանական աշխարհ» հատվածը, որում տեղ են գտել մոտ 1000 անուն բույսեր։ 60-70-ական թվականներին բուսաբանական այգում մոտ 5000 անուն բուսատեսակ կար։ Վերջին 10-15 տարիներին վերացել է տեսականու գրեթե կեսը, մասնավորապես՝ արևադարձային բույսերը։