«ԵՄ-ն Երևանի համար. արևային համայնք» ծրագրի վերաբերյալ տեղեկանք

Հայաստանում վերականգնվող էներգետիկայի և էներգախնայողության ոլորտում իրականացվող բարեփոխումների քաղաքականությունը հաշվի առնելով՝ 2018 թվականին Երևանի քաղաքապետարանը սկսեց հետաքրքիր մի գաղափարի իրագործում: Եվրոպական Միության աջակցությամբ «Քաղաքապետերի Դաշնագրի» նախաձեռնության շրջանակում Երևանի 90 բազմաբնակարան շենքերի տանիքներին որոշվեց տեղադրել արևային ֆոտովոլտային կայաններ: Ծրագիրն իր բովանդակային և սոցիալական ազդեցության մասշտաբներով առաջինն ու միակն է ինչպես Երևանում, այնպես էլ Եվրոպական միության «Քաղաքապետերի դաշնագիր» նախաձեռնության անդամ հանդիսացող մյուս քաղաքների շարքում:
Ծրագիրը համահունչ է նաև Երևանի «Կայուն էներգետիկ զարգացման գործողությունների ծրագրի» նպատակներին, քանի որ Ծրագրի իրականացման արդյունքում CO₂ արտանետումները կնվազեն տարեկան շուրջ 453 տոննայով: 

Ծրագրի ընդհանուր բյուջեն կազմում է 1.250.000 եվրո, որից 250.000 եվրոն համաֆինանսավորվել է Երևանի քաղաքապետարանի կողմից:

Ծրագրի նպատակն էր՝
•    էներգախնայողության և էներգաարդյունավետության միջոցով կրճատել բնակիչների էներգետիկ ծախսերը ընդհանուր օգտագործման տարածքներում, 
•    խթանել «կանաչ տնտեսական աճ»-ը,
•    նվազեցնել ջերմոցային գազերի արտանետումները և բարձրացնել հարմարավետության մակարդակը՝ արդյունքում նպաստելով բնակիչների կյանքի որակի բարելավմանը:

Առաջնահերթ շենքերի ընտրության դժվարին փուլն էր: Շենքերի ընտրությունը կատարվել է համատիրությունների միջոցով և, հաշվի առնելով տարածքային համաչափ զարգացման սկզբունքը և ընդգրկելով բոլոր վարչական շրջանները՝ բացառությամբ Նորք Մարաշի: Ընտրությունն անելիս տեխնիկական չափորոշիչներից բացի՝ հաշվի է առնվել նաև սոցիալական բաղադրիչը: 

«ԵՄ-ն Երևանի համար. արևային համայնք» ծրագիրը գործնական փուլ մտավ 2020 թվականին: 

Նախապես որոշված 90 շենքի փոխարեն արևային ֆոտովոլտային համակարգեր տեղադրվեցին 97 շենքի տանիքներին: Դրանք  ապահովում են վերելակների, շքամուտքերի, աստիճանահարթակների, ինչպես նաև բակերի լուսավորության համար անհրաժեշտ էլեկտրաէներգիան: Ծրագրի իրագործման շնորհիվ մենք հնարավորություն տվեցինք բնակիչներին տնտեսել իրենց միջոցներն ավելի քան 50%-ով, ինչպես նաև ապահովել շուրջ 77%-ով նվազեցնել էլեկտրաէներգիայի սպառումն ընդհանուր օգտագործման տարածքներում:

Ծրագրով շենքերում ու բակերում տեղադրվել են նոր էներգախնայող LED լուսատուներ: 
Հաշվի առնելով ծագրի սոցիալական կարևոր բաղադրիչը հնգական LED լուսատուներ են տրամադրվել շուրջ 300 անապահով ընտանիքների:
Շենքերից յուրաքանչյուրի համար ստեղծվել են նպատակային բանկային հաշիվներ, որտեղ կուտակվելու են բնակիչներից գանձված գումարները և Հայաստանի էլեկտրական ցանցեր ՓԲԸ-ին վաճառված էլեկտրաէներգիայից գոյացած եկամուտը: Կուտակված գումարը կուղղվի անհատույց օգտագործման հանձնված համակարգերի սպասարկմանը և բնակիչների որոշմամբ շենքերում էներգախնայող  ծրագրերի իրականացմանը:
Տեխնիկական բազմաթիվ խնդիրներ, քաղաքացիների հետ տուն առ տուն աշխատանք, ծրագրի մասին իրազեկման արշավներ՝ տասնյակ հարցազրույցներ, հարյուրավոր հրապարակումներ, մշտապես ակտիվ սոցիալական հարթակներ և երկար սպասված ծրագիրն այսօր ամբողջությամբ և հաջողությամբ ավարտված է: 

Ծրագրի գերխնդիրն ու գերնպատակն էր՝ խթանելով «կանաչ տնտեսական աճ»-ը, նվազեցնել ջերմոցային գազերի արտանետումներն, ինչպես նաև բարելավվել շուրջ 27 000 բնակչի կյանքը: 
 

Ծրագրով մշակվել է նաև «Արևի էներգիան՝ քո տանը» ուղեցույցը