Գտնվում է Մաշտոցի 46 հասցեում, Ալեքսանդր Թամանյանի կողմից նախագծված «Ժողովրդական տան թատրոն» շենքում: Արամ Խաչատրյանի անունով համերգասրահն անվանակոչվել է 1979 թվականին՝ ՀԽՍՀ Մինիստրների խորհրդի համապատասխան որոշմամբ:  Կառույցի գլխավոր մուտքի դիմաց տեղադրված է Արամ Խաչատրյանի հուշարձանը (քանդակագործ` Յուրի Պետրոսյան), որը տեղադրվել է 1999թ.` մեծն Ա. Խաչատրյանի ծննդյան օրը (հունիսի 6)։ Դահլիճի ներքին հարդարանքը ներառում է հայկական զարդանախշերի խորաքանդակներ։
Համերգասրահը նախատեսված է 1276 հանդիսատեսի համար։

Պաշտոնապես անվանակոչվել է Առնո Բաբաջանյանի անունով 2005թ. դեկտեմբերի 25-ին: Գտնվում է Մշակույթի տան, ներկայիս Թանգարանների շենքի (Հանրապետության հրապարակ) առաջին հարկում։ Մուտքը` Աբովյան փողոցից։ Շենքը կառուցվել է 1916թ.` ճարտարապետ Վ. Սիմոնսոնի նախագծով։ 1953, 1961, 1977 թվականներին վերակառուցվել է ճարտարապետ Մ. Գրիգորյանի և Է. Սրապյանի ղեկավարությամբ։
Համերգասրահը նախատեսված է 300 հանդիսատեսի համար, այդ պատճառով էլ մինչև անվանափոխությունը կոչվել է «Հայֆիլհարմոնիայի համերգային փոքր դահլիճ» անվանումը։

Կամերային երաժշտության տունը տեղաբաշխված է Օղակաձև զբոսայգում՝ ճարտարապետ Ստ. Քյուրքչյանի 1977թ. կառուցած շենքում։ Կամերային տունն առանձնահատուկ շինություն է: Կառուցված է «ազատ հատակագծի» սկզբունքով. հանդիսասրահը, բեմը, ճեմասրահը, նախասրահն առանց սահմանների են՝ ստեղծելով ներքին ամբողջականության միջավայր։
Այստեղ տեղի են ունեցել հայկական և միջազգային համերգներ, փառատոններ։ Շենքի գեղարվեստական լուծումը համահունչ է զբոսայգու պուրակային ճարտարապետությանը։