Աշխարհահռչակ կոմպոզիտոր Արամ Խաչատրյանի տուն-թանգարանը հավերժացնում է մեծ արվեստագետի հիշատակը, պահպանում և ապագա սերունդներին է փոխանցում նրա երաժշտական հարուստ ժառանգությունը:
Աշխարհահռչակ կոմպոզիտոր Արամ Խաչատրյանի տուն-թանգարանը հիմնադրվել է 1978 թվականին: Այն ստեղծվել է մարշալ Բաղրամյան պողոտայի և Պլեխանով (այժմ` Զարոբյան) փողոցի հատման հատվածում գտնվող այն առանձնատան հիման վրա, որ 1945 թվականին Արամ Խաչատրյանին նվիրել է Խորհրդային Հայաստանի կառավարությունը: Կոմպոզիտորը շատ է սիրել երևանյան իր այս տունը: Հայաստանում գտնվելիս այստեղ է իջևանել, ընդունել հյուրերին և ստեղծագործել: Արամ Խաչատրյանի ցանկությունն է եղել, որ իր միակ տուն-թանգարանը բացվի հենց Երևանում:
Առանձնատունը (ճարտարապետ՝ Մարկ Գրիգորյան) ուներ հինգ ընդարձակ սենյակներ և տնամերձ այգի։ Այն տուն-թանգարանի վերածելու որոշումը ՀԽՍՀ  Նախարարների խորհրդը կայացրել է 1976 թ. հուլիսի 21-ին՝ Արամ Խաչատրյանի կենդանության օրոք։ Առանձնատունը պահպանվել է անփոփոխ, իսկ տուն-թանգարանի շենքը կառուցվել է այգու տարածքում: Թանգարանի ներքին բակում Ա. Խաչատրյանի ծննդյան 105-ամյակի առթիվ (2008) կառուցվել է հուշաղբյուր, որը ճարտարապետներ Ս. Գուրզադյանի և Ս. Բարսեղյանի նվերն է թանգարանին: Ճարտարապետ Մարկ Գրիգորյանի մահից հետո (1978) նրա գործը շարունակել է ճարտարապետ Էդուարդ Ալթունյանը:
Թանգարանը երկհարկանի, նկուղով, ներքին բակով, ատրիումային տիպի շենք է, որի բոլոր մասերը փոխկապակցված են և կազմում են միասնական ճարտարապետական-հատակագծային համակարգ: Առաջին հարկում Հուշատունն է, ֆոնդադարանը, գրադարանն ու աշխատասենյակները: Ճեմասրահից ոլորապտույտ աստիճանները տանում են երկրորդ հարկ, ուր 10 ընդարձակ և լուսավոր ցուցասրահները նախատեսված են մշտական ցուցադրության համար: Երկրորդ հարկում են նաև ձայնադարանը և համերգասրահը: 
Շենքի ճակատային մասում՝ ամբողջ կառույցի բարձրությամբ կառուցված են կամերտոն հիշեցնող 5 կամար¬ներ: Շենքը կառուցված է Անիի տուֆից, կամարները տրավերտինից են:                              
Արամ Խաչատրյանի տուն-թանգարանի պաշտոնական բացումը տեղի է ունեցել 1982 թ., իսկ առաջին ցուցադրությունը բացվել է 1984 թ. հունվարի 23-ին։
Թանգարանում պահվում են ավելի քան 18 000 արժեքավոր առարկաներ՝ լուսանկարներ, նամակներ, գրքեր, նոտային ձեռագրեր, ստեղծագործություննների տարբեր հրատարակություններ, ֆիլմեր, ձայնագրություններ, փաստավավերագրական նյութեր և այլն: Տուն-թանգարանում գործում է նաև Հայաստանում եզակի և հարուստ հավաքածուով ձայնադարան (հավաքածուն ներառում է մոտ 7 հազար խտասալիկ), որտեղ բացի Արամ Խաչատրյանի ստեղծագործություններից կարելի է ունկնդրել նաև համաշխարհային դասականների ստեղծագործությունները աշխարհահռչակ երաժիշտների կատարմամբ:
Տուն-թանգարանի գրադարանում ընդգրկված են կոմպոզիտորի գրեթե բոլոր հրատարակված ստեղծագործությունները, հայերեն և օտարալեզու գրականություն, գիտահետազոտական նյութեր և մենագրություններ, որոնք լուսաբանում են կոմպոզիտորի կյանքի հայտնի և անհայտ էջերը:  Տուն-թանգարանը արխիվացնում է նաև հայ և օտարազգի կոմպոզիտորների և երաժիշտների մասին մենագրությունները և նրանց ստեղծագործություններից:

ԺԱՄԵՐԸ ԵՎ ՄՈՒՏՔԸ

https://museumsarmenia.am/am/museums/museum/13

Ավետիք Իսահակյանի տուն-թանգարանը ներկայացնում է բանաստեղծի կյանքն ու գրական ժառանգությունը:
Հայ մեծանուն բանաստեղծ Ավետիք Իսահակյանի հիշատակը հավերժացնելու նպատակով 1958 թվականին նրա առանձնատունը վերածվում է տուն-թանգարանի: 1963 թվականի հոկտեմբերի 31-ին տեղի է ունենում տուն-թանգարանի բացումը: 
Թանգարանի շենքը ուղղանկյուն հատակագծով, կիսով չափ երկհարկ, սև տուֆից շինություն է: Առաջին հարկի կամարում լուսամուտներն ունեն կիսաշրջան եզրակալներ: Երկրորդ հարկը լուսավորվում է երդիկներից:
Թանգարանի բնական շարունակությունն է ծաղկաշատ այգին: Այգու խորքում տեղադրված է Ռաֆայել Իսրայելյանի նախագծած տուֆակերտ նստարանը, քիչ հեռու՝ Նիկողայոս Նիկողոսյանի կերտած` Իսահակյանի բրոնզաձույլ կիսանդրին և Նորայր Կարգանյանի նախագծած տուֆակերտ հուշապատը:
Ավետիք Իսահակյանի տուն-թանգարանի ցուցադրությունն այցելուին է ներկայանում հուշային մասով և բանաստեղծի կյանքն ու գրական ժառանգությունը ներկայացնող մշտական ցուցադրությամբ: Հուշային մասը կազմում են բանաստեղծի` առաջին հարկում գտնվող աշխատասենյակը, ննջարանը, հյուրասենյակը, ինչպես նաև գողտրիկ այգին: Այստեղ ամեն ինչ պահպանվում է այնպես, ինչպես եղել է նրա կենդանության օրոք: Բանաստեղծի աշխատասենյակում կարելի է տեսնել նրա հարուստ գրադարանը, հնօրյա գրասեղանը, բազմոցը, անձնական իրերը։ Հուշային սենյակներից է Վարպետի հյուրասենյակը, որտեղ սովորաբար անցկացվում էին գրական հավաքներ, տոնական խնջույքներ: Թանգարանի հուշային մասը եզրափակում է ննջարանը, որտեղ կախված է սիրելի մոր` Ալմաստի լուսանկարը: Թանգարանում ներկայացված են նաև ձեռագրեր, տարբեր տարիների հրատարակություններ, լուսանկարներ, անձնական իրեր, կարևոր վավերագրեր:

ԺԱՄԵՐԸ ԵՎ ՄՈՒՏՔԸ

https://museumsarmenia.am/ru/museums/museum/7

Կոմիտասի թանգարան ինստիտուտի գործունեությունն ուղղված է հայ ազգային կոմպոզիտորական դպրոցի հիմնադիր Կոմիտաս Վարդապետի ստեղծագործական ժառանգության հանրահռչակմանը։
Կոմիտասի թանգարան-ինստիտուտը գտնվում է Կոմիտասի անվան զբոսայգում և կառուցվել է նախկին մշակույթի պալատի հիման վրա: Վերջինս 1950-ական թթ. նախագծել է ճարտարապետ Կորյուն Հակոբյանը, իսկ նորաստեղծ կառույցի ճարտարապետը Արթուր Մեսչյանն է:
Թանգարանը պաշտոնապես բացվել է 2015 թվականին: Մշակութային-գիտական այս հաստատությունը հագեցած է ժամանակակից տեխնոլոգիաներով, ունի բազմաֆունկցիոնալ կառուցվածք՝ մշտական և ժամանակավոր ցուցադրությունների սրահներ, համերգային դահլիճ, երաժշտական գրադարան, հրատարակչություն: 
Կոմիտասի թանգարան-ինստիտուտում իրականացվում են ավանդական և ակադեմիական երաժշտության համերգներ, դասախոսություններ և սեմինարներ, «Կոմիտաս» միջազգային գիտաժողով–փառատոնը։ Թանգարանում կազմակերպվում են կրթական բազմաժանր ծրագրեր՝ նախատեսված տարիքային և սոցիալական տարբեր խմբերի համար, ինչպես նաև ամառային դպրոց։ Թանգարանի գիտահետազոտական ինստիտուտում իրականացվում են Կոմիտասի կյանքին ու գործունեությանը, ինչպես նաև հայ ավանդական ու դասական երաժշտությանը նվիրված գիտական ուսումնասիրություններ։ Կոմիտասի թանգարան-ինստիտուտի հրատարակչությունը լույս է ընծայում մենագրություններ, գիտական հոդվածների ժողովածուներ, երաժշտական մատենաշարեր, ցուցադրությունների պատկերագրքեր և Կոմիտասին վերաբերող այլ ուսումնասիրություններ։ Կոմիտասի թանգարան-ինստիտուտում գործում է երաժշտական գրադարան, որը ներառում է երաժշտագիտական գրքերի և ձայնապնակների հարուստ հավաքածու։
Կոմիտասի թանգարան-ինստիտուտի մշտական ցուցադրությունը բաղկացած է ութ սրահներից, որոնցում արտացոլված են Կոմիտասի կյանքի ուղին, նրա երաժշտագիտական, կոմպոզիտորական, բանահավաքչական և կատարողական գործունեությունը: Թանգարանի ժամանակավոր ցուցադրությունների սրահում պարբերաբար կազմակերպվում են Կոմիտասին, նրա գործունեությանն ու ժամանակաշրջանին, նրա ժամանակակիցներին, ինչպես նաև արվեստի տարբեր ճյուղերին նվիրված ցուցադրություններ (երաժշտություն, կերպարվեստ, լուսանկարչություն և այլն)։ 

ԺԱՄԵՐԸ ԵՎ ՄՈՒՏՔԸ

https://museumsarmenia.am/ru/museums/museum/14

Երվանդ Քոչարի թանգարանը տարածաշրջանում պատմական ավանգարդի ուսումնասիրման և պրոպագանդման կարևորագույն կենտրոն է:
Երվանդ Քոչարի թանգարանը ստեղծվել է 1984 թվականին՝ քանդակագործի արվեստանոցի տեղում: Այն տարածաշրջանում պատմական ավանգարդի ուսումնասիրման ու պրոպագանդման եզակի կենտրոն է: Քոչարը Փարիզում (1923-1936) եռանդուն մասնակցություն է ունեցել պատմական ավանգարդ արվեստի կերտման գործում: Նրա փարիզյան շրջանի ստեղծագործական ժառանգությունը պատկանում է ինչպես հայ, այնպես էլ եվրոպական մշակույթին: Ֆրանսիայում նա ստեղծեց պլաստիկ-գեղանկարչական նոր արտահայտչաձև՝ տարածական նկարչությունը, որը արվեստի խոշորագույն տեսաբանների կարծիքով, ավանգարդ արվեստի մեծագույն նվաճումներից է: 1936թ. Քոչարը ստորագրում է «Դիմանսիոնիզմի մանիֆեստը», որը ժամանակի նորագույն գեղագիտական սկզբունքների ազդարարն էր: Բավական է աչքի անցկացնել ստորագրողների ցանկը (Արպ, Դելոնե, Կալդեր, Դյուշան, Կանդիսկի և այլք), և ընթերցողի առջև հառնում է ոչ միայն ավանգարդ կերտողների ընտրանին, այլև Քոչարի արվեստի տեղն ու դերը ժամանակի մեջ և այդ արվեստագետների շարքում: 1936թ. Քոչարը ներգաղթում է ԽՍՀՄ և հայտնվում «Երկաթե վարագույրից» այս կողմ՝ բերելով ժամանակակից արվեստի շունչը, ոգին, մոտեցումները: 
Երվանդ Քոչարի ստեղծագործությունները ներկայացված են աշխարհի բազմաթիվ թանգարաններում, սակայն միայն այստեղ կարելի է հնարավորինս ամբողջական պատկերացում կազմել արվեստագետի անցած ողջ ստեղծագործական ճանապարհի մասին. ցուցադրվում են «Թիֆլիսյան», «Փարիզյան», «Երևանյան» շրջանների գեղանկարներ, գրաֆիկաներ, քանդակներ, սեղմումով գործեր: Միայն այստեղ և Փարիզի Պոմպիդու կենտրոնում կարելի է տեսնել քոչարյան արվեստի այն հրաշքը, որ կոչվում է «տարածական նկարչություն»: Ներկայացված են նաև ավանգարդի մեծերի հետ Քոչարի առնչությունների մասին վկայող հազվագյուտ փաստաթղթեր և մեծարժեք վավերագրեր:

ԺԱՄԵՐԸ ԵՎ ՄՈՒՏՔԸ

https://museumsarmenia.am/ru/museums/museum/3

20-րդ դարի մեծանուն նկարիչ Մարտիրոս Սարյանի տուն-թանգարանը հիմնադրվել է 1967 թվականին՝ նկարչի կենդանության օրոք: Կերպարվեստի ֆոնդի հիմքը կազմել են Սարյանի կողմից նվիրաբերված ստեղծագործությունները: Սարյանի տան հատակագծի հեղինակն է Ալեքսանդր Թամանյանը, թանգարանային հատվածը կառուցվել է Մարկ Գրիգորյանի նախագծով: Մինչև 2013 թ. թանգարանի շենքը բաղկացած է եղել նկարչի երկհարկանի առանձնատնից և կից կառուցված եռահարկ պատկերասրահից: 2013-2016թթ. կառուցվել է 4-րդ հարկը, բաց պատշգամբը վերածվել է գրադարան-արխիվի, թանգարանը համալրվել է թեքահարթակով, վերելակով, ցուցադրության լրացուցիչ տարածքներով և բազմաֆունկցիոնալ դահլիճով: 
Սարյանի տուն-թանգարանի ցուցադրությունը ներկայացնում է նկարչի ստեղծագործական բոլոր շրջաններն ու ժանրերը: Թանգարանի՝ 300-ից ավելի ստեղծագործությունից բաղկացած մշտական ցուցադրությունում են գտնվում «Արևելյան ծաղիկներ», «Ջրհորի մոտ. շոգ օր», «Ինքնադիմանկար», «Գիշերային բնանկար», «Եգիպտական դիմակներով նատյուրմորտ», «Քայլող կինը» գլուխգործոցները: Այցելուները հնարավորություն ունեն նաև տեսնելու Վարպետի արվեստանոցը և նրա տան հուշային ցուցադրությունը:

ԺԱՄԵՐԸ ԵՎ ՄՈՒՏՔԸ

https://museumsarmenia.am/ru/museums/museum/11

Ալեքսանդր Սպենդիարյանի տուն-թանգարանը Հայաստանում առաջին երաժշտական-հուշային թանգարանն է:
Հայ դասական սիմֆոնիկ երաժշտության հիմնադիր, կոմպոզիտոր Ալեքսանդր Սպենդիարյանի տուն-թանգարանը բացվել է 1967թ. նոյեմբերի 25-ին: Այն Հայաստանում առաջին երաժշտական-հուշային թանգարանն է: Տուն-թանգարանի շենքը (կառուցվել է 1925-26) գտնվում է Երևանի Թումանյան-Նալբանդյան փողոցների խաչմերուկում: Այն Խորհրդային Հայաստանի առաջին բազմաբնակարան շենքերից է և հանրապետական նշանակության հուշարձան է: Այս շենքի երկրորդ հարկի բնակարաններից մեկում Ալեքսանդր Սպենդիարյանը ապրել է 1926-28 թթ-ին, որն այժմ նրա տուն-թանգարանն է: 
Ալեքսանդր Սպենդիարյանի տուն-թանգարանի հավաքածուն ներառում է կոմպոզիտորի անձնական իրերը, երաժշտական գործիքները, փաստաթղթեր, նամականին ու ձեռագրեր, որոնք վկայությունն են նրա ստեղծագործական հարուստ կյանքի, հայ և համաշխարհային երաժշտության մեջ նրա թողած մեծ ավանդի: Մշտական ցուցադրությունը ներկայացված է «Կյանքի ուղին» և «Ստեղծագործական ուղին» սրահներում, իսկ կոմպոզիտորի աշխատասենյակը վերականգնված է ճշգրտորեն, ինչպես եղել է նրա կենդանության օրոք: Այստեղ այցելուները կարող են տեսնել կոմպոզիտորի մտահղացմամբ 1905 թ. ստեղծված Սպենդիարոֆոն երաժշտական գործիքը և լսել դրա ինքնատիպ hնչողությունը, ունկնդրել Սպենդիարյանի «Վալսը» նրա Յակոբ Շտայներ (Jakob Stainer) ֆիրմայի ջութակի հնչողությամբ, ծանոթանալ նրա «Ալմաստ» օպերայի բեմական փառահեղ ուղուն: Ինտերակտիվ կրթական ծրագրերի բազմազանության մեջ այցելուները կարող են փորձել իրենց դիրիժորական կարողությունները «Վիրտուալ դիրիժոր» ծրագրի միջոցով, շրջել «Սպենդիարյանական վայրերով», ստեղծել իրենց սիմֆոնիկ նվագախմբը և այլն: Տուն-թանգարանում իրականացվում են համերգներ, ցուցահանդեսներ, գիտաժողովներ, մշակութային բազմաբնույթ միջոցառումներ:

ԺԱՄԵՐԸ ԵՎ ՄՈՒՏՔԸ
https://museumsarmenia.am/ru/museums/museum/12

Արա Սարգսյանի և Հակոբ Կոջոյանի տուն-թանգարանում ներկայացված են հայկական կերպարվեստի երկու խոշորագույն վարպետների ստեղծագործությունները:
Մեծանուն քանդակագործ Արա Սարգսյանի և անվանի նկարիչ Հակոբ Կոջոյանի առանձնատունը կառուցվել է 1935 թ., ՀԿԿ ԿԿ առաջին քարտուղար Աղասի Խանջյանի նախաձեռնությամբ: Հեղինակը ճարտարապետ Վարազդատ Արևշատյանն է: Այստեղ իրենց ընտանիքներով ապրել և ստեղծագործել են հայկական կերպարվեստի երկու խոշոր վարպետները: 1973 թ. շենքն անվանի արվեստագետների ժառանգների ցանկությամբ տրամադրվել է պետությանը: Թանգարանը հիմնադրվել է 1973 թ. ՀԽՍՀ Նախարարների խորհրդի 1970 թ. մայիսի 25-ի որոշ¬մամբ: Արա Սարգսյանի և Հակոբ Կոջոյանի տուն-թանգարանը Հայաստանի ազգային պատկերասրահի 13 մասնաճյուղերից մեկն է։
Արա Սարգսյանի արվեստի բաժնում ցուցադրված են քանդակագործի ստեղծագործությունները, լուսանկարներ, հուշաձեռագրային նյութեր: Ներկայացված են նաև արվեստագետի թատերական ձևավորումներն ու գրաֆիկական գործերը: Քանդակագործի արվեստում գերիշխող է եղել դիմաքանդակի ժանրը: Փայլուն տիրապետելով արձանագործական արվեստում կիրառվող նյութերին` մարմարի, գրանիտի, բրոնզի, փայտի մեջ նա մարմնավորել է հայ ականավոր գործիչներ Մանուկ Աբեղյանի, Հրաչյա Աճառյանի, Թորոս Թորամանյանի, Սուրեն Սպանդարյանի, Վարդան Աճեմյանի և այլոց կերպարները:
Առանձնատան երկրորդ հարկում ներկայացված են Հակոբ Կոջոյանի ստեղծագործությունները, հուշաձեռագրային փաստաթղթերն ու անձնական իրերը: Աշխատանքների մեծ մասը Հայաստանի ազգային պատկերասրահի հավաքածուից են, որոշ մասը՝ նկարչի ժառանգների նվիրատվությունն է։
Առանձնատան բակում տեղադրված են միջնադարյան խաչքար, Արա Սարգսյանի աշխատանքներից «Մայր Հայաստան», «Սահակ Պարթև և Մեսրոպ Մաշտոց», «Արտավազդ Բ» քանդակները: Քարե պարսպին ամրացված են «Շեփորահարներ», «Շինարարություն», «Մխիթար Հերացի» հարթաքանդակները:
Տուն-թանգարանի մուտքի մոտ՝ 1981 թ. տեղադրվել է Հակոբ Կոջոյանի և Արա Սարգսյանի հուշակոթողը (ճարտարապետ՝ Ռոմեո Ջուլհակյան, քանդակագործ՝ Էդուարդ Աղայան): Այն ուղղաձիգ պատվանդանի վրա տեղադրված բարդ կոնֆիգուրացիայով, զույգ կամարակապ խորշերով երկկողմանի ծավալ է: Խորշերից մեկի մեջ տեղադրված է Հ. Կոջոյանի, մյուսում՝ Ա. Սարգսյանի դիմաքանդակը: Դիմաքանդակները բրոնզից են, աչքի են ընկնում դիմապատկերային նմանությամբ:

ԺԱՄԵՐԸ ԵՎ ՄՈՒՏՔԸ

ԱՇԽԱՏԱՆՔԱՅԻՆ ԺԱՄԵՐ
Երեքշաբթիից կիրակի՝ 11:00-17:00

ՄՈՒՏՔ
Մեծահասակներ - 1000 դրամ
Աշակերտներ, ուսանողներ, թոշակառուներ - 500 դրամ
Մինչև 12 տարեկան երեխաների մուտքը անվճար է։

ԷՔՍԿՈՒՐՍԻԱ
Հայերեն/օտար լեզու – 3000 դրամ
 

Ալեքսանդր Թամանյանի անվան ճարտարապետության ազգային թանգարան-ինստիտուտը պահպանում և հանրահռչակում է հայ նոր ճարտարապետության հիմնադիր, Երևանի գլխավոր հատակագծի հեղինակ Ալեքսանդր Թամանյանի ստեղծագործական ժառանգությունը:
Ալեքսանդր Թամանյանի անվան ճարտարապետության ազգային թանգարան-ինստիտուտը հիմնադրվել է 1990 թվականին Աշոտ Հայկազուն Գրիգորյանի կողմից:
Թանգարանի դիմաց տեղադրված է Ալեքսանդր Թամանյանի կիսանդրին, քանդակագործը Արտաշես Հովսեփյանն է:
Թանգարանն ուրույն տեղ է գրավում Երևանի մշակութային կյանքում: Այստեղ իրականացվում են ցուցահանդեսներ ճարտարապետության, քաղաքաշինության և շինարարական արվեստի թեմաներով։ 
Ալեքսանդր Թամանյանի անվան ճարտարապետության ազգային թանգարան-ինստիտուտում պահվում են ճարտարապետության, քաղաքաշինության և շինարարական արվեստի պատմության, ինչպես նաև հայրենիքում և արտերկրում ստեղծագործող հայազգի ճարտարապետների գործունեության վերաբերյալ բարձրարժեք նյութեր:
Թանգարանը պահպանում և հանրահռչակում է հայ նոր ճարտարապետության հիմնադիր, Երևանի գլխավոր հատակագծի հեղինակ Ալեքսանդր Թամանյանի ստեղծագործական ժառանգությունը, հավաքագրում է ճարտարապետի կյանքին ու գործունեությանը վերաբերող արխիվային, լուսանկարչական, գծագրական, պատմատնտեսական, անձնական և ցուցադրական այլ նյութեր, դրանց հիման վրա իրականացվում են գիտահետազոտական աշխատանքներ: Թանգարանի հավաքածուն ներառում է ճարտարապետ-հետազոտողի Ռուսաստանում, Հայաստանում և Իրանում ապրած տարիները լուսաբանող շուրջ 3000 փաստագրական նյութեր (հեղինակային նախագծեր, լուսանկարներ և այլ վավերագրեր): 

ԺԱՄԵՐԸ ԵՎ ՄՈՒՏՔԸ

ԱՇԽԱՏԱՆՔԱՅԻՆ ԺԱՄԵՐ
Երեքշաբթիից կիրակի՝ 10:00-17:00

ՄՈՒՏՔ
Մուտքը՝ անվճար
 

Ֆրանսահայ աշխարհահռչակ երգիչ, շանսոնիե, երգահան, բանաստեղծ, կինոդերասան, հասարակական գործիչ Շառլ Ազնավուրը երգարվեստի աշխարհում ուրույն մեծություն է:
«Ազնավուր» կենտրոնի ստեղծումը խոշոր նախագիծ է, որի վրա աշխատել է անձամբ Շառլ Ազնավուրը իր կյանքի վերջին երկու տարիներին։ Այն տեղակայված է Կասկադի բարձունքի վերին հատվածում։ Այստեղ կազմակերպվում են կրթական և մշակութային միջոցառումներ՝ համերգներ, ցուցահանդեսներ, կոնֆերանսներ։
Գործում է ինտերակտիվ թանգարան, որի 10 սրահներում ներկայացված են Շառլ Ազնավուրի կյանքի ամենաէական փուլերը՝ ընտանիքի պատմությունից մինչև համաշխարհային ճանաչում։ Բաժինները ներկայացված են աուդիոգիդի միջոցով՝ հենց Ազնավուրի ձայնի ուղեկցությամբ, ինչպես նաև տրամադրվում են բազմաբնույթ ֆունկցիոնալ հնարավորություններ նոր երգեր ստեղծելու և մշակելու համար: 
Ազնավուր կենտրոնում գործում է նաև կրթական և մշակութային կենտրոն՝ կինոարվեստի, երաժշտության և ֆրանսերենի ուղղվածությամբ: Այստեղ անցկացվում է նաև ֆրանսերենի ուսուցում, որտեղ դասավանդման դասական եղանակին զուգահեռ կիրառվում է  ֆրանսերենի յուրացման նոր մեթոդ՝ Ազնավուրի երգերի տեքստերի և երաժշտության օգնությամբ։ 

ԱՅՑԵԼՈՒԹՅԱՆ ՄԱՍԻՆ ՏԵՂԵԿԱՏՎՈՒԹՅՈՒՆ

https://aznavourfoundation.org/am/projects/charles_aznavour_museum

Թանգարանը ներկայացնում է նորվեգացի բևեռախույզ, Խաղաղության նոբելյան մրցանակակիր Ֆրիտյոֆ Նանսենի կյանքը և գիտական ու մարդասիրական գործունեությունը:
Ֆրիտյոֆ Նանսեն թանգարանի բացվել է 2014 թվականին բարերարներ՝ ՀՀ վաստակավոր բժիշկներ Կառլեն և Սառա Եսայանների ջանքերով:
Թանգարանի շենքի ճարտարապետը Ալբերտ Սոխիկյանն է: Թանգարանի մուտքի մոտ տեղադրված է Ֆրիտյոֆ Նանսենի արձանը (քանդակագործ՝ Տիգրան Հովհաննիսյան):
Թանգարանում մշտապես կազմակերպվում են միջոցառումներ, գրքերի քննարկումներ, շնորհանդեսներ, գիտաժողովներ, ֆիլմերի դիտումներ, հանդիպումներ հայ մտավորականների հետ: Թանգարանում իրականացվում են նաև բազմաբնույթ կրթական ծրագրեր, «Մարդասիրությունը միակ ռեալ հնարավոր քաղաքականությունն է» և «Նանսենյան փրկության անձնագիր» թեմաներով բաց դասեր: 
Ֆրիտյոֆ Նանսենի թանգարանում ներկայացված են գրքեր, ֆիլմեր, ցուցապաստառներ, քանդակներ,  որոնք անդրադառնում են նորվեգացի բևեռախույզ, Խաղաղության նոբելյան մրցանակակիր Ֆրիտյոֆ Նանսենի կյանքին և գիտական ու մարդասիրական գործունեությանը:

ԱՇԽԱՏԱՆՔԱՅԻՆ ԺԱՄԵՐ
Երեքշաբթիից շաբաթ՝ 10:00-17:00

ՄՈՒՏՔ
Մուտքը՝ անվճար

Տնօրեն՝ Ժորա Հակոբյան
Հասցե՝ Նանսենի փ. 4/4
Հեռ.՝ +374 96 000 813
 

Կարեն Դեմիրճյանի թանգարանը ցուցադրում, ուսումնասիրում և հավերժացնում է հայ ժողովրդի պատմության նորագույն շրջանի ազգային, պետական և քաղաքական խոշորագույն գործիչ, ՀՀ Ազգային հերոս Կարեն Դեմիրճյանի կյանքն ու գործունեությունը:
Կարեն Դեմիրճյանի թանգարանը հիմնադրվել է 2001 թվականի հունվարի 9-ին ՀՀ կառավարության N9 որոշմամբ: 
Թանգարանում կազմակերպվում են գիտաժողովներ, հանդիպումներ գիտության, մշակույթի, արտադրության ներկայացուցիչների և քաղաքական գործիչների հետ:
Կարեն Դեմիրճյանի թանգարանում ներկայացված են Հայ ժողովրդի պատմության նորագույն շրջանի՝ 1960–1990 թթ. պատմության հիմնախնդիրները: Թանգարանում ցուցադրվում են Կ. Դեմիրճյանի աշխատանքային օրագրերը (ձեռագիր), պետական պարգևները, ձեռագիր հուշագրությունները, անձնական իրերը, ՀԿԿ ԿԿ 1-ին քարտուղարի աշխատասենյակի կահույքը:
Առանձնակի ուշադրության է արժանի Կարեն Դեմիրճյանի անձնական արխիվը, որը պահվում է թանգարանի ֆոնդում:

ԱՇԽԱՏԱՆՔԱՅԻՆ ԺԱՄԵՐ
Երկուշաբթիից շաբաթ՝ 11:00-17:00

ՄՈՒՏՔ
Մուտքը՝ անվճար

Տնօրեն՝ Վահագն Մամյան 
Հասցե՝ Ղազար Փարպեցի 7
Հեռ.՝ +37410 531 710, 535 521 
Էլ. հասցե՝ museum-ksd@rambler.ru
 

Հայաստանի բնության պետական թանգարանն արտացոլում է Հայաստանի ինքնատիպ բնական համալիրը, բնության բազմազանությունը:
ՀՀ Շրջակա միջավայրի նախարարության ենթակայությամբ գործող Հայաստանի բնության պետական թանգարանը հիմնադրվել է 1952 թվականին: Այն ԽՍՀՄ տարածքում գործող բնության 8 համալիրային թանգարաններից մեկն էր: Թանգարանի հիմնական նպատակը բնակչության բնապահպանական դաստիարակությանը և բնապահպանական կրթությանը նպաստելն է, ինչպես նաև բնապահպանական քարոզչություն իրականացնելը: 
Հայաստանի բնության պետական թանգարանը ներկայացնում է Հայաստանի ինքնատիպ բնությունն ու կենդանական աշխարհը, ֆլորայի ու ֆաունայի հազվագյուտ  տեսակներ, վայրի կենդանիների խրտվիլակներ: Ցուցասրահներում, որտեղ ներկայացված ցուցանմուշները յուրօրինակ հանրագիտարան են յուրաքանչյուր այցելուի համար, հնարավորություն են ընձեռում պատկերացում կազմել Հայաստանի աշխարհագրական դիրքի, ռելիեֆի, երկրաբանական կառուցվածքի, կլիմայական պայմանների մասին:
Թանգարանում ներկայացված է նաև ակվարիումային ձկնատեսակների մշտական գործող ցուցադրություն, որտեղ այցելուները կարող են տեղեկություններ ստանալ տվյալ ձկնատեսակի և նրա խնամքի վերաբերյալ:

ԺԱՄԵՐԸ ԵՎ ՄՈՒՏՔԸ

ԱՇԽԱՏԱՆՔԱՅԻՆ ԺԱՄԵՐ
Երեքշաբթիից ուրբաթ՝ 10:30-16:30
Շաբաթ և կիրակի`  10:30-16:00

ՄՈՒՏՔ
Մեծահասակներ - 1000 դրամ
Օտարերկրյա քաղաքացիներ - 2000 դրամ
Ուսանողներ - 700 դրամ
Դպրոցականներ - 500 դրամ

ԷՔՍԿՈՒՐՍԻԱ
Հայերեն - 3000 դրամ
Օտար լեզուներ – 3500 դրամ